PROVINCE OF CEBU- Gisaway sa kagamhanan sa Kapitolyo sa Sugbo, si Senador Raffy Tulfo sa pagkwestiyon sa P10 nga bayronon sa pansayan sa Cebu North Bus Terminal (CNBT) sa Barangay Mabolo, dakbayan sa Sugbo atol sa iyang surprise inspection niadtong miaging semana.
Kini maoy reaksyon sa mga opisyal sa probinsiya atol sa press conference nga gipangulohan ni Cebu Provincial Governor Gwendolyn Garcia, Provincial Legal Consultant Atty. Rory Jon Sepulveda ug uban pa kagahapon, Huwebes, Abril 10, 2025 sa Cebu Provincial Capitol.
Subay niini, “sayup” ang mga komento ni Senador Tulfo sa ‘surprise inspection’ sa CNBT ug giingnan pa siya nga “ignorante siya sa sitwasyon.”
Pipila sa gisusi sa Senador mao ang taas nga bayad sa terminal, guba nga electric fan, guba nga push cart, ug pansayan nga adunay koleksyon sa matag gamit, ingon man ang mga bus nga adunay mga kalapasan.
Matod ni Gobernador Garcia, pipila sa mga reklamo sa senador gawas sa ilang hurisdiksyon tungod kay ubos kini sa responsibilidad sa Land Transportation Office (LTO) ug Land Transportation Franchising and Regulatory Board (LTFRB).
“Ignorance of the law, whether you are an ordinary citizen or you are a sitting senator of this Republic of the Philippines, excuses no one. So it is incumbent upon us, public officials, to be more circumspect in the manner by which we conduct official and personal business,” Gov. Gwen.
Kabahin sa kahimtang sa terminal, giingong importante kini tungod kay ang pakigtambayayong sa Cebu Provincial Capitol sa SM City Cebu mao ang tag-iya sa yuta nga tukoran og non-permanent facilities gikan sa pundo sa Kapitolyo.
Dugang pa, ang contractor nga si Mister Loo ang nag-operate sa sanitary facilities niining giaprobahan nga public-private partnership sa presyo nga P10 ngadto sa P20 matag gamit.
Una niini, kaniadtong Biyernes, Abril 4, gi-inspeksyon ni Tulfo ang CNBT nga wala gipahibalo sa Gobyerno sa Probinsiya, sumala ni Sepulveda.
Atol sa iyang pagbisita, gitumbok ni Tulfo ang daghang kalapasan sa safety regulation sa mga bus operators nga iyang giingon nga nagbutang sa peligro sa kinabuhi sa mga pasahero.
Gisaway usab niya ang kakuwang sa pushcarts ug non-functioning ceiling fan sa passenger area. Gipahibalo sa senador ang iyang pag-inspeksyon sa CNBT sa iyang page sa TikTok kaniadtong Martes, Abril 8.
