Nangandam na ang Kagamhanang Lalawigan sa Sugbo sa ilang umaabot nga Libreng Medical and Surgical Mission sa lungsod sa Balamban sa Kasadpang probinsya nga gikatakda katong Agosto 23-24, 2025.
Sumala pa sa nahimong coordination meeting sa mga kadagkuan sa Kapitolyo nga “all-systems go” na sila sa ikatulong Medical-Surgical Mission nga mahitabo sa Cebu Provincial Hospital – Balamban.
Gipangulohan ang panagpulong ni Capitol Health Consultant Dr. Nikki Catalan uban ang mga nagkadaiyang participating groups aron sa paghan-ay sa mga preparasyon sa duha ka adlaw nga kalihukan.
Lakip sa mga hisgutanang ilang gituko maong ang logistics, transportation, accommodation, pagkaon, security, ug mga assignment sa mga support groups.
Gani ang mga ekipong medikal kay nakalatid na sa maong tambalanan ug uban pang kahimanan nga gamiton.
Ang nagpadayong medical-surgical mission kay kabahin sa mga lakang sa administrasyon ni Cebu Provincial Governor Pamela “Pam” Baricuatro aron sa pagdalit og accessible, dekalidad, ug libreng serbisyong medikal ilabi na sa mga hilit nga mga dapit sa lalawigan.
Ingon man nga gipasalamatan ni Catalan ang mga organisasyon ug mga pribadong institusyon nga nakig-alayon sa maong kalihokan sama sa All-Terrain Medical Relief Organization, Perpetual Succour Hospital, Cebu Velez General Hospital, Cebu Medical Society, ug Visayas MED.
