CEBU PROVINCE-Isip pagpangandam sa nagkaduol nga Pasigarbo sa Sugbo Festival of Festivals karung Agosto 27 sa Carcar Sports Complex, nagpatawag si Cebu Provincial Governor Gwendolyn Garcia og usa ka coordination meeting kauban ang nagkadaiyang stakeholders arun sa pagsiguro sa hapsay ug luwas nga kasaulogan.
Pipila sa gituki sa maong panagpulong ang billeting sa mga performers nga nakatahas sa nagkadaiyang tunghaan sa dakbayan sa Carcar, Sibonga ug San Fernando.
Gihisgotan usab ang logistics, pagsiguro sa mga imprastraktura nga dili maka-bulilyaso sa mga performers ug sa mga tawo nga manan-aw, kalig-on sa koneksyon sa internet, kuryente, seguridad ug ang hapsay nga dagan sa trapiko.
Ang Pasigarbo sa Sugbo kansang giila nga pinakadakong kasaulogan sa nagkadaiyang kapistahan sa tibuok probinsiya sa Sugbo, ang ipahigayon sa dakbayan sa Carcar, habagatan nga bahin sa lalawigan, ug salmotan sa 50 ka mga nagkadaiyang lungsod.
Gilauman ang pagdagsa sa mga tawo nga musaksi sa maong kalihokan, mas doble ang gihimo nga pagpangandam sa mga nagkadaiyang stakeholders, ilabi na nga walo na lang kaadlaw og Pasigarbo sa Sugbo na.
Giklaro usab ni Governor Garcia nga istriktong gidili ang paggamit ug pagpanghuwam og welding compressor sa mga tunghaan gumikan kay posibli unya kini nga hinungdan sa pagboto sa transformer.
‘Automatic disqualification’ ang silot sa mga makalapas sa maong lagda.
Mukabat sa 52 ka mga local government units lakip na ang highly urbanized cities sa Sugbo, ang dakbayan sa Mandaue ug Lapu-Lapu, ang musalmot sa maong kalihokan.
Gitataw usab nga usa ka dakong pag-uswag sa ekonomiya sa probinsiya ang Pasigarbo sa Sugbo nga mahimong dako nga tabang sa pag-usbaw sa kita sa mga lokal nga negosyo ug uban pa.
Sa pagkakarun, padayon ang pagpangandam sa mga LGUs ug working team sa tinguha nga mapahigayon kini nga hapsay ug malampuson.
