CEBU – Aduna nay mga “persons of interest” ang Cebu City Police Office (CCPO) sa sunod-sunod nga insidente diin gikataho nga pipila sa mga panimalay ning dakbayan gisulod sa mga tawo nga nagpailang pulis ug nangawat sa mga butang sa mga biktima.
Kini ang gitataw ni Police Col. Ireneo Dalogdog, hepe sa CCPO nga nakadawat sila og pipila ka impormasyon bahin sa ilang pagkatawo ug gimanduan ang mga hepe sa pagsusi sa impormasyon.
Una nang nakadawat og taho ang CCPO nga dunay grupo sa mga indibidwal ang nisulod sa mga panimalay ug nagpakaaron-ingnon nga operasyon sa ilegal nga drugas apan gikuha lang ang mga butang sa biktima.
Dugang pa ni Dalogdog nga ila karong gisusi kon ang nagpaluyo sa maong insidente mga kanhi polis ug mga asset nga nataktak sa serbisyo tungod sa kalambigitan sa ilegal nga kalihokan.
Giawhag sa opisyal ang publiko nga doblehon ang pag-amping ug importante nga masayran ang Standard Operating Procedure kung adunay gustong mosulod sa ilang mga balay.
