CEBU CITY- Nakaandam na ang mga sakop sa kapulisan karong adlawa alang sa gipahigayong Fluvial ug Solemn Foot Procession, aron masiguro ang kaluwasan ug seguridad sa maong mga kalihokan, ilabi na nga gilauman ang daghang partisipante.
Matod ni Police Regional Director Redrico A. Maranan, andam na ang mga kapulisan uban ang tabang sa Philippine Coast Guard, Armed Forces of the Philippines (AFP), ug pipila ka mga volunteer groups aron bantayan ang kahusay ug kalinaw sa maong aktibidad.
Gibanabana nga 2,000 ka mga pulis ang ipakatap sa nagkadaiyang bahin sa Dakbayan sa Sugbo, ilabi na nga adunay ipahigayon nga Solemn Foot Procession sa hapon, aron masiguro nga walay kakulian o insidente nga mahitabo atol sa mga kalihokan.
Gipahibalo usab nga ipapatuman ang total gun ban sa tanang dapit sugod karong adlawa hangtod Enero 31, 2026, isip dugang nga lakang sa pagbantay sa kaluwasan, ilabi na alang sa mga mosalmot sa ASEAN Summit nga ipahigayon sa katapusang bahin sa kasamtangang bulan.
Sa laing bahin, nakaandam na usab ang kapulisan nga ipakatap sa Probinsya sa Bohol alang sa umaabot nga ASEAN Summit, diin pipila ka mga pulis naka-augment na ug dugang nga deployment gilauman sa mosunod nga mga adlaw.
