CEBU CITY-Nagpadayon gihapon sa pag-awhag ang mga kapulisan sa Sugbo ngadto kang Bianca Lee kinsang nipatim-aw nga laing witness sa kamatayon ni Rhea Mae Tocmo nga makig-alayon kini sa buhatan alang sa pagsusi sa mga ebidensya nga gihuptan niini.
Giklaro usab ni Police Lieutenant Colonel Janette Rafter, deputy director operations sa Cebu City Police Office (CCPO), nga wala kini nabalaka nga makaapekto ang indibidwal sa ilahang nasang-at nga kaso batok sa suspek sa pagpatay sa biktima nga si Rhea Mae Tocmo.
Asoy pa ni Rafter nga kompleto ang mga ebidensya nga nakuha sa mga kapulisan lakip na ang forensic examination result nga nag-match sa suspek, affidavit of witnesses, extrajudicial confession, ug mga CCTV footage nga nagtumbok kang Simeon Gabutero.
Nihimo na og lakang ang mga kapulisan sa Sugbo diin nakig-coordinate na kini sa korte arun masayran kon unsay angay buhaton nila ngadto sa mga nanggawas nga impormasyon nga makahatag og kalibog sa katawhan.
Giangkon sab ni Rafter nga na-challenge sila tungod igo ra gipaagi sa social media ang nipatim-aw nga adunay nasayran sa wala pa namatay ang biktima apan, wala kini nakahimo og duol sa buhatan sa mga kapulisan arun sa pagsusi sa mga naasoy niining mga ebidensya.
