PROVINCE OF CEBU-Nagpahigayon ang kapulisan sa lungsod sa Argao og ‘hot pursuit operation’ batok sa usa ka lalaki nga gipasanginlan nga nipatay sa iyahang bayaw nga babaye sa usa ka ‘road barricade’ niadtong adlaw sa Martes, Agosto 8, 2023.
Giila ang biktima nga si Rufa Alcosero Velchez, 43-anyos kinsang gipusil-patay sa Sitio Pag-undangan, Barangay Tiguib sa lungsod sa Argao, dakbayan sa Sugbo.
Nasayran, nga ang biktima ug ang anak nga 14-anyos nga lalaki padulong na unta mopauli sa dihang nahitabo ang krimen.
Ang suspek nga si Rufo Villacorte Manila, padayon nga gipangita sa mga kapulisan sa Argao tungod sa pagpatay kang Velchez.
Base sa imbistigasayon ni Police Major Ivy Martin Bartolome, hepe sa Argao Police Station, nga posibleng hinungdan sa pagpusil sa biktima ang nagtapok nga mga punoan sa kahoy ang nakabara sa dalan paingon sa pinuy-anan sa mga Velcheze.
Gidugang pa ni Bartolome nga ang naasoy nga barikada nakapwesto sa gawas sa balay ni Rufo.
Samtang, nitug-an ang 14-anyos nga anak sa biktima ngadto sa mga imbestigador nga nikuha og saw machine ang iyahang inahan ug gipangputol ang mga kahoy nga nagtapok.
Apan, nakit-an kini sa suspek nga dali nga nakasulod sa iyahang panimalay ug sa dihang nibalik na kini nagdala na sa iyahang armas.
Gikataho nga ikaduhang higayon kini gipusil ni Rufo hinungdan nga nakaangkon ang biktima og mga samad sa lain-laing bahin sa iyahang lawas ug hinungdan nga na-‘Dead on the spot’ ang 43-anyos nga babaye samtang ang suspek daling misibat palayo sa lugar.
