CENTRAL VISAYAS- Gibutang gihapon sa Heightened Alert ang status sa Police Regional Office (PRO) 7, agig pagpangandam sa gipaabot nga epekto human sa Bagyong “Opong” sa tibuok Central Visayas, diin ang Search and Rescue (SAR) personnel gi-activate ug naka-standby alang sa dinaliang deployment kon gikinahanglan.
Gitino ni PBGen Redrico A. Maranan, Regional Director sa PRO7, nga ang maong lakang kabahin sa proactive measures sa command aron masiguro ang kaluwasan sa publiko ug mamentinar ang kaandam sa pakig-alayon sa mga local government units, disaster risk reduction councils, ug uban pang hingtungdan nga ahensya.
Dugang pa niya nga ang mga police units sa tibuok rehiyon gimanduan sa pag-monitor pag-ayo sa mga bulnerable nga lugar ug pagpabiling mabinantayon sa posibleng mga emerhensya.
Gipasalig sa PRO7 sa publiko nga ang mga personahe ug mga kahinguhaan niini magpabilin nga bug-os nga standby sa paghatag og tabang, pagmentinar sa kahapsay, ug paghatag og seguridad sa tibuok panahon sa kasamok sa panahon.
Sa pikas bahin, gikumpirmar usab ni Col. Dennis Francis Pastor, ang head sa PDDRMO, Cebu nga anaa gihapon sa blue alert status ang PDDRMO ug naka-standby ang ilang mga personahe aron sa mga nagkinahanglan og tabang.
Anaa sa kapin 900-ka pamilya ang gipabakwit sa amihanan ug sentro sa Sugbo kagahapong adlawa.
Lakip sa mga apektadong lugar mao ang lugar sa Madridejos, Daanbantayan, San Remigio, Tudela, Santa Fe, ug Bantayan.
