CENTRAL VISAYAS-Gipangandaman sa Police Regional Office (PRO-7) ang pagpatuman sa hugot nga seguridad sa ikaduhang State of the Nation Address (SONA) ni President Ferdinand “Bongbong” Marcos, Jr.
Nasayran, nga ipahigayon ang SONA sa presidente sa Batasang Pambansa Complex, Quezon City sa Lunes, Hulyo 24 nga e-broadcast live sa mga social media platforms.
Gibutyag ni PRO7 Regional Director, Police Brigadier General Anthony A Aberin nga ipatuman nila ang maximum tolerance, dungan sa pagrespeto sa freedom of expression ug ang katungod sa tanan nga katawhan sa paghimo ug malinawon nga rally.
Subay niini, giawhag ni Aberin ang katawhan nga paminawon ang presidente samtang mupadangat sa iyang report sa state of the nation ug unsa ang gihimo sa gobyerno aron masulbad ang mga hagit.
Dugang pa, nga giawhag usab niini ang publiko nga muhimo ug aktibo nga papel sa pagtabang sa gobyerno alang sa maayong Pilipinas.
Gitambagan sa direktor ang publiko nga magbinantayon ug mas maayong likayan una ang mga kadalanan atol sa maong okasyon subay sa gilauman nga mga ipahigayon nga lihok protesta.
