CENTRAL VISAYAS-Mokabat sa 121- ka mga Police Station sa tibuok Central Visayas ang nag activate sa “Kontra Bigay” Complaint Desks nga nagsugod niadtong Marso, aron sa pagpanalipud sa integridad sa umaabot nga piniliay.
Kini nga inisyatiba subay sa direktiba sa Hepe sa Philippine National Police (CPNP), nga pakusgon ang mga paningkamot batok sa mga kalapasan nga may kalabotan sa eleksyon ug pagsiguro sa usa ka patas, matinud-anon, ug hapsay nga proseso sa tibuok nasud.
Subay niana, ang maoong lagda magsilbi nga pahimangno sa mga botante ug kandidato nga ubos sa Batas Pambansa Blg. 881, Seksyon 261(a), nga ang pagpamalit og boto ug pagbaligya sa boto hugot nga gidili nga mga buhat ug angay nga silotan sa balaod.
Dugang pa, ang pagpamalit og boto mahitabo kung adunay bisan kinsa nga tawo nga nagtanyag, naghatag, o nagsaad og salapi, trabaho, publiko o pribado nga mga grant, o bisan unsang butang nga adunay bili aron maimpluwensyahan ang mga botante nga pabor sa usa ka kandidato. Samtang, ang pagbaligya sa boto naglakip sa pagpangayo o pagdawat og salapi, mga saad sa katungdanan, nga makaapekto sa resulta sa usa ka eleksyon.
Ang mga malapason nag-atubang ug mga silot lakip na ang pagkabilanggo sa usa ngadto sa unom ka tuig nga walay probasyon, pagka disqualified sa paghupot sa katungdanan sa publiko, ug pagkawala sa katungod sa pagbotar.
Samtang, ang Rehiyon-7 kay nagpabiling generally peaceful bisan sa mga panghitabo nga posibleng adunay koneksyon sa politika sama sa nahitabo sa Badian.
Mao kini ang gipaambit ni PBGEN. Redrico Maranan, ang Regional Director sa PRO-7 nga magpabilin nga magbantay ang kapulisan sa rehiyon 24/7 alang sa pagsiguro nga hapsay ug malinawon ang umaabot nga piniliay.
Nipahimangno usab ang opisyal sa mga kriminal nga adunay dautang intensyon sa rehiyon nga dako ang tsansa nga mabilanggo kung magpabadlong sa Central Visayas. | Bombo Nathaniel Sandoval
