CEBU – Gisusi kagahapong adlawa sa Lapu-Lapu City Police Office (LCPO) ang work areas sa mga tighimog pabuto sa Barangay Babag, dakbayan sa Lapu-Lapu.
Ang inspeksyon gipangulohan ni Police Colonel Elmer Lim, hepe sa LCPO, uban sa pipila ka mga personahe sa Bureau of Fire Protection (BFP).
Gihimo kini aron masusi kung ang mga tiggama nagpraktis ba sa mga lakang sa kaluwasan nga gimando sa balaod.
Matud pa ni Lim nga sa pagkakaron, tulo lang ka manufacturers ang awtorisado ug lisensiyado sa paggama og pabuto sa naasoyng dakbayan.
Atol sa pag-inspeksyon, ang mga tiggama gimandoan nga mag-stock kanunay og usa ka tambol nga tubig sa ilang work station, ug usa ka fire extinguisher nga magamit kung adunay emerhensya ug mga aksidente.
Gimandoan usab ang mga trabahante nga dili manigarilyo ug dili magdala og lighter o posporo sa ilang mga workstation.
Gipahinumdoman usab ni Lim ang mga Oponganon nga mogamit lang og firecrackers sa designated area nga giila sa mga otoridad.
Matod niya nga dakpon ug pamultahon ang mga masakpan nga mogamit og pabuto gawas sa designated area.
