CEBU CITY-Giangkon ni Cebu City Police Office Director Police Colonel Ireneo Dalogdog, nga nagkuwang gayud ang kapulisan sa syudad sa Sugbo gumikan na usab sa gidaghanon sa mga tawo.
Matud pa, angayan nga anaa lang sa “1 is to 500” ang ratio sa kapulisan ug katawhan, apan gumikan sa pagsaka sa ihap sa mga tawo, giingong ang ratio ang mikabat na sa “1 is to 1000”, butang nga naghimo na lang sila ug pipila ka mga adjustments.
Sigon ni Colonel Dalogdog nga gimando-an na niini ang mga station commanders nga mag-assign ug mga beat patrolers diin mao ang mututok sa mga crime prone areas sa ilahang hurisdiksyon ug bugtong imbestigador, jail officer, desk officer ug ang hepe lang ang mahabilin sa police station.
Gi-asoy sa opisyal nga ang maong mga beat patrolers ang magtutok sa mga dapit nga adunay daghang tawo sulod sa ilahang mga area of responsibility.
Kini ang pamahayag ni Colonel Dalogdog subay sa mga insidente sa snatching, robbery ug uban pang mga ‘petty crimes’ nga nahitabo sa syudad.
Gitino usab sa police director nga wala man sila’y na-monitor nga mga sindikato nga nakasulod sa syudad ug ang mga nadakpan nila kay mga giingong mga nag-binugtong kini ug walay mga grupo diin mangita lang gayud ug higayon nga makahimo sa pagpanglabni ug uban pa.
Gipahimangnoan usab ni Colonel Dalogdog nga magbinantayon sa palibot ug kung mahimo dili ipagawas ang cellphone ug uban pang mahalon nga gamit kung anaa sa kadalanan nga makadani sa mga snatcher ug uban pang badlungon sa katilingban.
