CEBU CITY-Gi-doble pa sa kapulisan sa lalawigan sa Sugbo ang ilang kampanya batok sa loose firearms, gumikan sa nagkaduol na ang Barangay ug Sanguniang Kabataan Election.
Matod ni Police Major Nolan Tagsip ang information officer sa Cebu Police Provincial Office nga gikan niadtong Agusto 28, 2023 atol gyud sa pag sugod sa election period hangtod sa Septembre 30, 2023 naka lusad na silag 263 ka operations.
Sa ilang data moabot na sa 38 ka suspetsado ang ilang nadakpan nga nag dalag armas diin 267 ka lain-laing kalibre sa armas ang ilang nasakmit gikan sa Comelec Checkpoints ug pag serve sa mga search warrant.
Dugang ni Tagsip nga moabot sa 104 ka mga police personnel nga nadestino sa mga police station sa kalungsuran ang gipang balhin sa laing mga police stations.
Kini human masuta nga aduna silay mga kabanay nga magpapili sa nagsingabot nga piniliay sa barangay sa Octobre 30.
Gipaniguro sa CPPO nga ang mga police dili magamit sa bisan kinsa nga kandidato ug wala usab kini dapigan.
