PROVINCE OF CEBU-Andam na ang mga pulis sa lalawigan sa Sugbo sa paghatag og hugot nga seguridad alang sa Barangay ug Sanguniang Kabataan Election (BSKE) karong umaabot Oktubre 30, 2023.
Matod ni Police Colonel Rommel Ochave, ang hepe sa Cebu Police Provincial Office (CPPO), nga ila nang giandam ang mga contingency plan sama sa pagbutang og mga polis sa polling precinct ug pagpatrolya sa mga barangay samtang nagkaduol ang piniliay.
Usa sa ilang tahas mao ang pagbungkag sa mga pribadong armadong grupo o PAGS ug paggukod sa mga kriminal nga nagtago-tago og armas nga magamit sa panahon sa kampanya.
Apan giklaro ni Ochave nga wala silay nabantayan nga mga armadong grupo nga mahimong magamit sa piniliay sa Oktubre.
Anaa sa 1,202 ka mga barangay sa Sugbo, wala pay nabantayan nga mga insidente nga may kalambigitan sa eleksiyon ang kapulisan, apan padayon ang ilang imbestigasyon pinaagi sa pagsubay og balik sa mga panghitabo sa miaging piniliay.
Matod ni Ochave, ila karong gipaabot ang pagsumiter sa certificates of candidacy gikan sa Agosto 28 hangtod sa Septiyembre 2 sanglit mao kini ang panahon nga posibleng masayran ang mga dapit nga adunay init nga political rivalry.
Magsugod ang gun ban sa Agosto 28 ug sama sa nangaging mga eleksiyon, mas hingusgan pa sa kapolisan ang pagpahigayon og checkpoints ilabi na kon magsugod na ang Comelec gun ban.
