LAPU-LAPU CITY- Nagpahimangno og hugot sa publiko ang Lapu-Lapu City Police Office (LCPO) batok sa pagbutang og bisan unsang babag sa mga gitudlo nga ruta nga gamiton alang sa mga kalihokan sa ASEAN 2026.
Giingon sa mga awtoridad nga isip kabahin sa gipahigayon nga pagpahugot sa seguridad ug pagdumala sa trapiko, ang tanan nga pangunang dalan nga agianan sa mga delegado, opisyal, ug awtorisadong sakyanan kinahanglan magpabiling libre ug walay obstruction sa tanang oras.
Lakip sa hugot nga gibantayan mao ang iligal nga pagparada sa mga sakyanan, mga materyales sa konstruksyon, ug uban pang dili awtorisadong estruktura, ingon man ang dili awtorisadong pagpamaligya sa mga dalan, nga mahimong hinungdan sa grabeng trapiko, pagkalangan sa operasyon, ug posibleng risgo sa kaluwasan sa publiko.
Ang LCPO, kauban ang mga hingtungdang ahensya, mopatuman sa mga balaod sa trapiko ug lokal nga ordinansa.
Dugang pa, nga ang mga makalapas mag-atubang og angay nga silot, lakip ang multa ug posibleng pagtangtang sa mga obstruction.
Giawhag usab sa kapulisan ang tanang motorista, negosyo, ug residente nga magtinabangay ug magpabiling mabinantayon ilabina sa panahon sa ASEAN-related activities.
