CEBU – Gimandoan sa Police Regional Office (PRO-7)-Central Visayas ang kapolisan sa dakbayan sa Mandaue nga sulbaron sa labing daling panahon ang pag-ambush sa abogado nga si Karen Quiñanola-Gonzales ug sa iyang anak.
Kini ang gibutyag ni Police Lieutenant Colonel Mary Crystal Peralta, tigpamaba ni Police Brigadier General Roque Eduardo Vega, nga ang insidente niadtong Huwebes usa ka talawan nga pag-atake, tungod kay ang biktima usa ka babaye nga abogado.
Matod niya nga gimanduan ni Vega ang Mandaue City Police Office sa paghimo og makuting imbestigasyon aron masulbad sa labing daling panahon ang krimen ug mailhan ang mga tawo nga nagpaluyo niini.
Dugang pa niya nga sa pagkakaron, wala pa gikonsiderar ni Vega ang pagtukod og special investigation task group (SITG) nga maoy modumala sa kaso, sanglit nagpaabot pa sila sa assessment sa case investigator.
Usa sa mga mando ni Vega, mao ang pagsubay kung diin gikan si Gonzales ug ang mga lugar nga iyang naagian sa wala pa mahitabo ang pag-atake, ug pagsusi kung nakadawat ba siya ug mga hulga sa kamatayon sa wala pa ang insidente.
Nanawagan usab siya sa mga nakakita sa pagpamusil nga mokooperar sa kapulisan sa imbestigasyon.
