MOALBOAL, CEBU-Giandam na sa kapolisan sa Moalboal Police Station ang pormal nga pagpasaka og kasong illegal overstaying batok sa 38 ka undocumented Chinese national nga gidudahang nalambigit sa ilegal nga Philippine Offshore Gambling Operation o Pogo sa lungsod sa Moalboal, Cebu.
Kini ang gikompirmar ni Police Captain Brigido Paca, ang hepe sa Moalboal Police Station nga ilang pasakaan og kaso ang mga dili dokumentado nga langyaw tungod sa paglapas sa Alien Registration Act of 1950 o Republic Act of 562.
Human sa search warrant nga gitumong ngadto sa usa sa mga dinakpan nga Chinese nga si Zhai Shi Ying ug laing 37 nga nagpuyo sa resort sa Brgy. Saavedra.
Pinaagi sa search warrant, nasakmit sa kapulisan ang dinosenang gadgets gikan sa mga langyaw. Apil na niini ang 34 nga computer sets, upat ka laptop ug 226 nga smartphones.
Dugang ni Paca, nga ipaubos na sa forensic examination ang mga nakumpiskar nga gadgets arun mahibaw-an kung nagamit kini sa mga illegal nga aktibidad, sama sa offshore online gambling.
