PROVINCE OF BOHOL- Aduna nay persons of interest ang Kapulisan sa Bohol Police Provincial Office sa pagbangga sa usa ka bangka nga nakapatay sa duha ka mga mananagat sa Barangay Malingin sa lungsod sa Bien Unido sa lalawigan sa Bohol, Biyernes, Mayo 2, 2025.
Atol sa atong eksklusibong pakighinabi kang PLTCOL Norman Nuez, tigpamaba sa BPPO, nasayran nga ang mga persons of interest mao ang nagtimon sa usa ka Motorbanca nga Triple-Engine, pula ang color nga maoy mibangga sa usa ka motorbanca nga color green nga gisakyan sa mga biktimang mananagat nga nagpahigayon ug illegal nga matang sa pagpangisda nga gitawag og “liba-liba” pasado alas 5 sa buntag sa kadagatan sa Malingin Island, Bien Unido Bohol.
Kini maoy hinungdan sa kamatayon sa mga biktima, nga giilang sila si Rene Awas Reyes ug Bjay Manayon, pulos manag-silingan kining duha ug nagpuyo sa lumulupyo sa Purok 5 sa Barangay Malingin, Bien Unido.
Dugang pa, nga nipahigayon sila og retrieval operation kung diin, unang nasalbar si Rene, kinsa nawad-an og pikas mata nunot sa insidente samtang si Bjay kay milanat pa og pipila ka oras usa ka-rekober diin nahiwa ang ulo niini.
Patay nang na-rescue si Bjay samtang dead-on-arrival sa pagdala sa duol nga tambalanan si Rene tungod sa mga samad nga nahiaguman.
Giklaro usab niini nga gimandoan sa Provincial Director sa PNP Bohol nga si PCOL Arnel Banzon, ang mga hepe sa upat ka lungsod ug information verification lakip na ang lalom nga imbestigasyon sa naasuy nga kaso, diin ilang gikabutyag nga walay mga sakop sa kapulisan ang nalambigit sa mao nga insidente.
Dugang pa ni Nuez nga sukwahi kini sa nauna nga taho, dili mga sakop sa kapulisan sa upat a mga Police Station nga duol sa lugar ang nakabangga sa mga biktima tungod kay wala niining mga lungsora ang nagpahigayon ug coastal law enforcement operations sa kadagatan sa ilang jurisdiction.
Mapasalamaton si Nuez ngadtu sa mga concerned citizens nga mireport sa insidente ug mitabang sa kapulisan sa gihimo niini nga imbestigasyun ug search rescue operations.
Apan iya usab nga gipahimangnoan ang mga netizens nga dili magpataka ug post sa bisan asa nga Social media platforms ilabi na kung dili pa kumpleto ug unverified pa ang impormasyon. Tungod kay pwede sila mapasakaan ug kaso nga “Cyber Libel” samot na kung mipasangil sila sa usa ka tawo, awtoridad o organisasyon, matuod man kini o dili.
Samtang sa pikas bahin, mitanyag si Bohol Provincial Governor Erico Aris Aumentado sa publiko og kantidad nga P300,000 gikan sa P200,000 kagahapon sa bisan kinsa ang makahatag og impormasyon kabahin sa insidente.
