CEBU CITY-Sunod-sunod ang coordination meeting sa mga kapulisan sa Sugbo ingon man sa mga nagdumala sa Sinulog Festivals hilabi na sa nagsingabot nga mga dagkong kalihokan sa umaabot nga adlaw.
Hinungdan nga mas gipahugtan pa sa kapulisan ang ilang mga awhag ug pahimangno sa mga mosalmot ug mosaksi sa mga nakalinyang kalihokan arun malikayan ang kagubot sama sa mga ilimnong makahubog, hinagiban, ug uban pa.
Nasayran usab pinaagi sa pakighinabi sa Bombo Radyo Cebu News Team kang Cebu City Police Office Director, Police Colonel Ireneo Dalogdog nga gidili ang pagpalupad og mga drone gawas sa gitahasan sa maong butang.
Apan, kung gani buot nimong magpalupad mamahimo usab nga moadto sa Regional Intelligence Division sa Police Regional Office 7 arun mangayo og permit gumikan gani dili kini nimo mabuhat mamahimong bawion kini sa mga kapulisan.
Sa pikas bahin, nag-request na ang kapulisan sa Sugbo sa National Telecommunications Commission nga adunay ‘signal jamming’ atol sa celebrasyon sa Sinulog Festivals.
Apan giasoy ni Dalogdog nga una ng mipagawas og pamahayag si Mayor Rama nga dili kini uyon sa signal jamming gumikan dako kini og tabang kon gani adunay emerhensiya sama sa mangawala ang ilang mga kabanay, higala ug uban pa.
Gani, andam mosunod ang kapulisan sa mando sa mayor sa dakbayan sa Sugbo.
