CEBU CITY- Gibuksan na ang mga tunghaan sa tibuok nasud karung adlawa Lunes, Hunyo 16, nga nagtimaan sa opisyal nga pagsugod sa School Year 2025–2026 uban sa Department of Education (DepEd) nga nagpaabot sa dul-an sa 27 milyones ka enrollees gikan sa preschool hangtod sa senior high school.
Kung diin, dinhi sa Sugbo, nakita ang pag-abot sa mga estudyante nga nagsul-ob sa ilang uniporme ug nagdala sa ilang mga gamit sa eskuylahan paingon sa ilang gi-assign nga mga lawak-klasehanan.
Ang uban giubanan sa mga ginikanan o tigbantay, samtang ang uban nipunta sa nataran sa eskuylahan nga sila ra, gigiyahan sa mga magtutudlo ug kawani.
Subay sa pag-abli sa klase, anaa usab ang mga Kapulisan gikan saCebu City Police Office, aron sa pagsiguro sa kaluwasan ug seguridad sa pagbukas sa klase sa mga tunghaan.
Atul sa pakighinabi sa Bombo Newsteam kang Police Lt. Col. Maria Theresa Macatangay, ang deputy chief for operations sa Cebu City Police Office (CCPO), gitino niini nga adunay mga kapulisan ang gipakatap sa mga tunghaan sa Cebu City, subay sa mandato ni Philippine National Police (PNP) Chief Gen. Nicolas Torre III.
Sa pikas bahin, nahimong hapsay ug linaw ra ang unang adlaw sa klase sa Abellana National high school gumikan kay wala ray mga panghitabo nga natala.
Matud pa ni Mrs. Evelyn Pielago ang principal sa maong tulunghaan nga nagpadayon pa sila pagdawat sa mga posibling magpa-enroll.
Dugang pa niini nga nanghinaot usab sila nga ma-monitor sa mga ginikanan ang ilang mga anak ug magtukod og network sa tunghaan, tungod kay ang pag-edukar sa mga tinun-an dili lang trabaho sa mga magtutudlo, kondili lakip na sa mga ginikanan.
Aduna nay gi bana-bana nga 5000 ka mga studyante ang hingit nang nagpa enroll sa maong tulunghaan.
