Cebu City- Nanguha pa karon ug mga ebedensya ang kapulisan partikular na ang task force Ungab nga maoy nagkupot sa imbestigasyon sa kaso nga pagpatay sa abogado nga si Atty Jonnah John Ungab.
Matud ni Police Sr Inspector Jonathan Taneo , ang hepe sa Homecide section sa CCPO ingon man spokesperson sa Taskforce Ungab, gibutyag niini nga ila pang gi consolidate ang mga pamahayag sa mga nakasaksi sa insidente ingon man usab pagsusi sa cctv footage nga ilahang nakuha gikan sa duol nga establishmento sa nahitabu-an sa krimen.
Suma niini nga ilaha pang gi verify ang ilahang nakuha nga mga ebedensya aron makakuha sila ug klaro nga identification sa mga suspek. Giangkon usab niini nga wala pa sila nakakuha sa uban pang gamit ni Atty Ungab sama sa cellphone niini.
Matud pa nga gihinay hinayan pa nila karon sa pagduol sa pamilya sanglit sayod sila nga anaa pa kini karon sa kaguol gumikan sa nahitabo sa ilahang kabanay.
Gipasalig usab ni Taneo ang pamilya Ungab, ingon man ang mga residente sa Ronda nga ilang giimbestigar pag-ayo ang maong kaso ug gusto usab nila nga maresolbar kini sa daling panahon.
Nangayo usab sila ug suporta ingon man kooperasyon sa ilang gipahigayong imbestigasyon hilabi na sa mga posible pang mga mamahimong witnesses sa kaso nga musuol lang sa kapulisan aron matabang nga masulbad ang maong kaso.
