Gibasura sa Makati City Prosecutor’s Office ang reklamo nga gipasaka sa kanhi drayber nga si Bonifacio “Totoy” Baro batok sa mga iladong personalidad ug beauty queen nga sila si Michelle Dee, Rhian Ramos, ug Samantha Panlilio kalabot sa mga alegasyon sa pagpang-atake ug illegal detention.
Kahinumduman nga si Baro, nga kanhi drayber ni Ramos, misang-at og kasong slight illegal detention, slight physical injuries, maltreatment, ug unlawful arrest batok sa tulo. Sumala sa reklamo ni Baro, wala matud pa siya tugoti nga makagawas sa usa ka condominium unit hangtod nga dili niya ihatag ang usa ka pula nga envelope nga adunay sulod nga mga sensitibong litrato.
Giabi-abi ug kaylap usab nga gipaambit sa kampo ni Michelle Dee ang maong desisyon, diin ilang gipahayag nga walay basehan ug walay kamatuoran ang mga pasangil batok sa ilang kliyente sukad pa sa sinugdanan.
Sa laing bahin, ang grupong Volunteers Against Crime and Corruption (VACC) nagpahayag nga ilang susihon ang pagbasura sa kaso ug magpasaka og motion for reconsideration, diin ilang gihulagway ang resolusyon nga “questionable.”
Sumala sa VACC, dako ang ilang pagtuo nga adunay mga importanteng ebidensya ug lig-ong katarungan nga nakaligtaan ug wala mahatagi og sakto nga gibug-aton sa gihimong desisyon sa prosecutor.
Tungod niini, suportahan sa grupo si Baro sa pagpasaka og Motion for Reconsideration ug andam silang mopadayon hangtod sa Korte Suprema kon kinahanglanon.
