TALISAY CITY, CEBU-Gikonsiderar nga sulbad na ang kaso sa 14-anyos nga tinun-an sa Talisay City, Cebu nga gipusil-patay sa Barangay Cansojong, dakbayan sa Talisay niadtong Abril 26, 2024.
Diin ang gitumbok nga responsable sa kamatayon sa biktima mao ang iyang maguwang nga lalaki nga si Edwin Reponte, 21-anyos kinsang padayon pang gipangita human miikyas ug nagtago-tago tungod sa krimen nga iyang nahimo.
Kasong reckless imprudence resulting in homicide ang ipasaka batok kaniya.
Samtang, laing duha ka mga suspek ang nalambigit sa kamatayon ni Jacquilene, ang mag-amahan nga sila si Junie ug Junielyn Gamana nga giingong miguba sa crime scene aron matago ang tinuod nga nahitabo sa krimen.
Kasong ‘obstruction of justice’ ug Accesories of the crime ang ilang giatubang, human gitagoan ang armas ug mga bala duol sa nahitaboan sa pagpamusil.
Narekober na ang armas ug gipaubos na sa ballistics examination.
Gipasabot usab ni Police Lt. Col. Epream Paguyod, ang hepe sa kapolisan sa Talisay nga sayop ang unang pamahayag nga giluwat sa pamilya sa biktima.
Diin, matud pa nga adunay misulod sa ilang balay ug nagpakaaron-ingnon nga kawatan apan layo kini sa kamatuoran.
Dugang pa niini nga giingong giguba ang pultahan aron pagsuporta sa ilang pamahayag nga pagpanglungkab ang motibo apan ang tinuod mao nga aksidenteng napatay sa iyang maguwang.
Nakakuha usab og CCTV footage ang mga kapulisan diin madunggan ang panag-estorya sa mga akusado samtang nanglimpyo sa lugar nga nahitabo ang krimen.
