CEBU – Taliwa sa mga hungihong nga mosaka ang kaso sa Covid-19 sa dakbayan Sugbo human sa piniliay, gibutyag ni Cebu City Councilor Joel Garganera, ang pangu sa Cebu City Emergency Operations Center, nga nagpabiling ubos ang kaso sa makamatayng sakit sa dakbayan.
Nagkanayon si Garganera nga sa 600 kapin ka indibidwal nga gipaubos sa Covid-19 test kagahapong adlawa walay nagpositibo niini hinungdan nga pabiling anaa sa 29 ang ihap sa aktibong kaso sa syudad.
Gibutyag usab niini nga sa 80 ka kinatibuk-ang barangay sa dakbayan, 65 niini ang walay nareport nga kaso sulod sa 10 ka adlaw.
Ug hapit na usa ka buwan nga walay natahong namatay tungod sa naasoyng sakit.
Mapasalamaton usab kini nga sa mga nakalabayng kalihokan pabilin gihapon nga nisunod ang publiko sa minimum public health and standard protocols ilabi na gayud ang pagsul-ob sa face mask.
