CEBU CITY-Misaka ang ihap sa mga nataptan sa sakit nga Hand, Foot, and Mouth Disease sa dakbayan sa Sugbo sa nakalabayng buwan sa Pebrero 2025 sumala pa sa buhatan sa Cebu City Health Department (CHD).
Kini ang gibutyag ni Dr. Daisy Villa, ang pangu sa CHD sa eksklusibong pakighinabi niini sa Bombo Newsteam diin saysay oa niini nga kini nga datos nanukad gikan sa ilang mga health centers nga kasagaran sa mga nataptan sa maong sakit kay mga batang gagmay.
Ang maong matang sa sakit kay gitataw nga usa ka “viral disease” nga nagpasabot nga dali kini mukatap sa mga indibidwal ilabi na kung wala kini gina-practice nga proper hand hygiene.
Gani dugang pa ni Dr. Villa nga dili lamang mga bata ang maigo sa maong sakit kay lakip gihapon ang mga hamtong ang panuigon ang matakdan ilabi na kung nataptan kini gikan sa nagpositibo sa maong sakit.
Gilantawang muabot sa 1 hangtod sa 2 ka semana ang recovery kung mataptan sa maong sakit hinungdan nga taas ang higayon nga maka-transmit kini sa mas daghang indibidwal.
Karong lang tuiga kay nakatala na CHD og 17 ka mga kaso sa Hand, Foot, and Mouth Disease diin sa Enero adunay 5 ka kaso og sa Pebrero 1 hantod 22 kay adunay 12 ka mga kaso nga pulos mga batang gagmay.
Mipahimangno ang buhatan sa publiko nga himoong batasan ang saktong panghugas sa kamot gamit ang running water ug sabon ilabi na kung gikan sa Comfort Room or padulong mukaon.
Dugang pa nga kung nagpositibo sa maong sakit (ma-bata man o tiguwang) kay mag self-isolate usa nga nagpasabot nga dili mutunga sa eskwela ug trabaho aron dili makapanakod sa uban.
