Nisaka og 32% ang mga kaso sa tipdas ug rubella sa Pilipinas sa 2025, base sa pinakabag-ong datos gikan sa Department of Health (DOH).
Gikan sa Enero hangtod Disyembre sa miaging tuig, nisaka kini ngadto sa 5,123 ka kaso gikan sa 3,880 ka kaso nga gitaho sa 2024.
Sumala sa DOH, sobra sa katunga sa mga nataptan sa sakit mga bata nga nag-edad og 5 ka tuig paubos ug mas bata sa unom ka bulan.
Kadaghanan sa mga kaso o mga 73% wala nabakunahan batok sa tipdas. Sa Disyembre lamang, anaa na sa 405 ka kaso sa tipdas ang nadugang.
Tungod sa pagsaka sa mga kaso sa sakit, giawhag sa DOH ang mga ginikanan nga pabakunahan ang ilang mga anak batok sa tipdas ug rubella sa pinakaduol nga health center.
Gipahibalo usab sa ahensya ang pagpatuman sa usa ka programa sa pagbakuna sa tibuok nasud nga adunay tumong nga mabakunahan ang 11 milyon nga mga batang Pilipino, sugod sa Mindanao, tungod kay kini ang mga rehiyon nga adunay pinakataas nga ihap sa mga bag-ong kaso sa tipdas ug rubella.
Ang programa sa DOH, nga gitawag og “Ligtas-Tigdas,” magsugod sa Enero 19 sa Mindanao, sundan sa Luzon ug Visayas sa Hunyo.
