CEBU CITY — Gihikay sa Criminal Investigation and Detection Group (CIDG)-7 ang kaso batok sa lima ka mga gituohang estafador, lakip na ang usa ka kanhi-vice mayor, human masikop sa usa ka entrapment operation sa dakbayan sa Mandaue.
Giila ang dinakpan nga si Ailyn Hopre Matulac, taga-Davao City, ug chief executive officer sa investment scam nga Phoenix EA Holding International Incorporated.
Lakip usab sa mga nasikop mao silang: Arjon Gumban, taga-North Cotabato, Caesar Ian Acenas, taga-Cagayan de Oro City, ug kanhi vice-mayor sa maong dakbayan; Maria Esperanza Makinano, taga-Cagayan de Oro City; ug si Adjetor Daya Jr., taga-Davao City.
Matud ni Police Major Edwin Lacostales sa CIDG-7 nga nagsugod ang operasyon sa Phoenix EA Holding niadtong buwan sa Abril sa Sugbo.
Nailhan ang maong kompaniya kaniadto sa pangalan nga Blitz Unlimited Incorporated apan giilisan nila ang pangalan sa dihang adunay mikiha batok sa mga kadagkuan.
Matud sa usa sa mga nabiktima nga Marlon de Casionabe nga mi-invest siya og 50,000 pesos niadtong buwan sa Hunyo sa tinguha nga makakuha og 30 percent nga return of investment.
Nahibaw-an na lang sa reklamante nga usa ka scam ang gibuhat sa Phoenix EA Holding sa dihang mo-claim unta kini sa iyang ginansiya.
Nagmahay ang biktima gumikan kay inutang man sa 5-6 ang kwartang gi-invest.
Gikatakdang ipaubos sa inquest ang mga dinakpan samtang gihikay ang kasong kalapasan sa Securities Regulation Code ug small-scale estafa batok kanila.
