Giklaro sa defense lawyer ni kanhi Presidente Rodrigo Duterte nga si Atty. Nicholas Kaufman nga ang neutralisasyon sa mga operasyon sa kapulisan sa kampanya batok sa ilegal nga droga wala magpasabot og pagpatay kondili pag-aresto lang.
Gihimo ni Kaufman ang pagklaro isip tubag sa gipresentar nga ebidensya sa prosekusyon sa “PRRD list” nga gitawag sa mga report sa media nga “kill list” diin daghang mga high value target lakip na ang kanhi Albuera Mayor Rolando Espinosa Sr. ug Raul Yap ang nalista nga “neutralized” o gipatay.
Pangatarungan ni Kaufman nga ang saksi mismo sa prosekusyon mipasabot nga ang neutralisasyon sa mga operasyon sa pulisya nagpasabot og pag-aresto ug dili pagpatay.
Ang depensa ni Kaufman mao nga ang neutralisasyon usa ka legal nga pagpugong o legal nga pag-aresto o pagpugong sa usa ka kriminal ug dili awtomatik nga pagpatay.
Dugang pagpasabot niini nga ang duha ka saksi mipasabut nga ang “lethal force” magamit lamang kung ang suspek mosukol, nga nagbutang sa kinabuhi sa pulis sa peligro, nga gibasi sa ordinaryong doktrina sa self-defense.
Ingon man usab, ang kanhi hepe sa Philippine National Police (PNP) ug karon Senador Ronald dela Rosa miklaro sa publiko nga ang neutralisasyon nagpasabot sa pag-aresto o pagdakop basi sa PNP operational procedure manual.
Gipasiugda usab sa depensa nga ang Korte Suprema sa Pilipinas wala mag-isyu og desisyon nga nagdeklarar nga ilegal ang gubat sa droga ni wala kini nagbalido sa mga sirkular sa PNP nga adunay giingon nga termino.
Apan, ang mga saksi sa prosekusyon sa ICC miingon nga sa konteksto sa Oplan Tokhang, ang “neutralize” nagpasabot og mando sa pagpatay.
