Gihatagan og gibug-aton ni Cebu City Councilor Jun Alcover ang kamahinungdanon sa pagbaton og kaugalingong ekipo taliwala sa hulga sa tinghuwaw o El Niño sa kaumahan sa Dakbayan sa Sugbo alang sa mga mag-uuma.
Sumala sa pahayag sa konsehal, iyang gisugyot ang pagpamalit og duha ka eksklusibong water tanker—usa alang sa amihanang bahin ug usa sa habagatan—aron adunay magamit nga tubig sa irigasyon sa kaumahan sa countryside.
Gitumbok usab niini nga kung magdepende lang sa mga water tanker sa City Disaster Risk Reduction and Management Office (CCDRRMO) o OPOS, kanunay nga malangan ang paghatag og tubig sa mga pananom tungod kay una nga gihatagan og prayoridad ang mga sakyanan nga mo-responde sa mga sunog ug pagtabang sa mga bombero.
Bisan pa man sa kaayo sa maong plano aron matabangan ang mga mag-uuma nga dili mauga ang ilang mga pananom, nagsubo ang konsehal tungod kay wala kini matuman o mapatuman sumala sa iyang gipresentar nga solusyon.
