CEBU CITY-Nangandam na ang Kawasan Falls sa Barangay Matutinao, lungsod sa Badian, alang sa pag-abli pag-usab karong bulana ngadto sa mga bisita ug turista.
Hinungdan nga gipailawom sa hingpit nga pagbansay-bansay ang mga tour ug canyoneering guides aron masiguro ang luwas ug talagsaon nga kasinatian sa turismo sa mga buot mubisita unya sa maong tourist spot.
Nagpailalom sa kasamtangan sa usa ka specialized Canyoneering Tour Guiding ang 936 nga mga tour guides, nga gibahin sa tulo ka mga batch, alang sa akreditasyon sa Departamento sa Turismo.
Matod pa sa tourism officer sa Badian, nga si Earl Vincent Endab nga ang maong komprehensibong training program nagtumong sa pagpahait sa ilang kahanas ug pag-una sa kaluwasan sa mga bisita.
Dugang pa niini nga sa nangaging mga sesyon, nakat-on usab sila sa Occupational First Aid Training, Basic Life Support Training, ug Filipino Brand of Service Excellence Training.
