Nitanyag ang Kingdom of Jesus Christ (KOJC) og P20 milyones nga reward sa makahatag og impormasyon sa tawo nga midonar og P10-M sa gobyerno isip reward sa pugante nga si Pastor Apollo Quiboloy.
Matod ni Atty. Israelito Torreon, abogado ni Quiboloy, nga gustong masayran sa KOJC kon kinsa ang nagpaluyo sa paghatag og P10-M ngadto kang Department of Interior and Local Government (DILG) Secretary Benhur Abalos.
Gidugang niini, nga ilegal ang pagdawat og kwarta gikan sa pribadong tawo ubos sa Republic Act 6713 section 70 nga tatawng nagdili sa mga public officials sa pagdawat og kwarta gikan sa pribadong tawo.
Buot usab mahibaw-an sa KOJC kon kinsa ang nagpaluyo sa pagporma sa assassination team nga giingong mopatay kang Quiboloy.
Ang nasangpit nga kantidad gikan sa ilang nagkalain-laing miyembro sa tibuok kalibutan.
Kahinumduman, nga niadtong Hulyo 8 ang DILG nipahibalo nga adunay tanyag nga P10-M nga reward kang bisan kinsa nga makatudlo sa nahimutangan ni Quiboloy ug tag-P1-M matag usa sa iyang kaubang akusado.
