CEBU CITY — Suspendido gihapon ang klase sa Metro Cebu ingon man sa pipila ka mga lugar sa lalawigan subay na sa posibleng kadaut nga dala sa bagyong Tisoy.
Base sa weather advisory sa PAGASA, nagpabilin sa Storm Signal No. 2 ang Northern Cebu samtang anaa sa Signal No. 1 ang nahibiling lugar sa Sugbo.
Tungod niini, mipahibalo ang Cebu Provincial Government nga walay klase karong adlawa gikan sa pre-school ngadto sa high school sa Bantayan Island, Daanbantayan, Medellin, San Remegio, Tabogon, Tabuelan, Borbon, Carmen, Catmon, Danao, Camotes Island, Asturias, Tuburan, Bogo, ug Sogod.
Samtang walay klase karong adlawa gikan sa pre-school ngadto na sa elementarya sa Compostela, Danao, Liloan, Consolacion, Mandaue, Cordova, Talisay, Minglanilla, Naga, San fernando, Aloguinsan, Toledo, Balamban, ug Pinamungahan.
Mipahibalo ang tagsa-tagsa ka mga local chief executives sa Mandaue City ug Lapu-Lapu nga walay klase sa tanang publiko ug pribadong tunghaan sa pre-school ngadto na sa elementarya.
Samtang gisuspenso ni Lapu-Lapu City Mayor Ahong Chan ang tanang byahe sa mga sakyanang pandagat alang sa kaluwasan sa mga pasahero ug mananagat.
Walay klase karon sa Cebu City gikan sa pribado ug publikong pre-school ngadto na sa senior high school human mipahibalo si Mayor Edgardo Labella.
Gi-anunsyo usab ni Talisay City Mayor Samsam Gullas nga walay klase karong aldawa sa public elementary ug high schools, lakip na ang Talisay City College.
Suspendido usab ang mga klase nag-unang mga tunghaan sa Sugbo sama lang sa University of Cebu, University of San Jose Recoletos, Southwestern University Phinma, ug Cebu Institute of Techonogy University gikan sa kindergarten ngadto na sa senior high school.
