CEBU CITY — Walay klase sa tanang publiko nga tunghaan ug walay trabaho sa tanang government offices sa dakbayan sa Lapu-Lapu karong adlawa subay na sa kapistahan sa Birhen sa Regla.
Matud ni Lapu-Lapu City Mayor Junard Ahong Chan nga suspendido ang klase sa mga public schools karong adlawa hangtud sa Nobyembre 21 samtang magdepende sa desisyon sa administration sa mga pribadong tunghaan kung isuspenso ba usab nila ang klase.
Kini aron makalikay ang publiko sa bug-at nga dagan sa trapiko subay sa kasaulugan sa pista.
Dugang pa ni Chan nga kinahanglang magpahigayon og make-up classes ang mga public schools sa weekend aron maibanan ang mga adlaw nga walay klase.
Samtang walay trabaho usab ang tanang government offices karong adlawa lang ug i-resume ang trabaho ugmang adlawa.
Gibutyag usan ni Chan nga magpabilin sa mga buhatan sa Lapu-Lapu City Government ang skeletal forces aron mosubay usab sa mga trabahuon.
