CEBU CITY-Padayon pa ang operasyon sa pagpangolekta sa nahabiling tapun-og sa basura sa Cebu City Sports Center (CCSC) ang buhatan sa Department of Public Services (DPS) pipila ka adlaw human sa Sinulog 2025 Grand Parade and Ritual Showdown.
Matod pa sa pamunuan sa DPS nga aduna na silay gidestino nga 10-wheeler truck sa CCSC aron sa hingpit nga paghipos sa tanang nakolektang basura sa venue sa Sinulog.
Dugang pa niini nga dili ma deploy sa DPS ang tanang ekipo nila ngadto sa CCSC tungod gi-assign pud ni nila sa lain mga Sinulog key areas ilabi na sa mga billeting quarters sa mga visiting contingents.
Gawas sa CCSC, ang DPS nangolekta usab og mga basura gikan sa ubang mga lugar nga may kalabotan sa Sinulog, apil na ang Basilica Minore del Sto. Niño de Cebu, Colon night market, J. Osmeña Street, General Maxilom Avenue, ug Ramos Street.
Pasalig sa buhatan sa publiko nga ilang mahipos tanan basura sa CCSC karong adlawa sa Sabado, Enero 25.
