Gikatakdang kompletohon sa gobyerno sa Pilipinas ang komprehensibong pagtuon sa posibleng pag-adjust sa sweldo sa mga trabahante sa gobyerno sa unang bahin sa 2024, kini ang pahayag ni Department of Budget and Management (DBM) Secretary Amenah “Mina” F. Pangandaman, sa Bombo News Interbyu sa grupo.
Gitumbok ni Pangandaman nga kini nga inisyatiba, nga gipangulohan sa DBM, ug ang Governance Commission for GOCCs (GCG), nagtumong sa pagsiguro sa patas nga compensation package nga nahiuyon sa pasalig sa Administrasyon sa usa ka lig-on ug andam sa umaabot nga serbisyo sibil.
Matod sa Budget Secretary, ang Compensation and Benefits Study nga gisugdan karon magtuki sa nagkalain-laing aspeto sa kasamtangang sistema sa kompensasyon, apil na ang mga sweldo, benepisyo, ug allowance, aron mailhan ang mga lugar nga angay pauswagon.
Pinaagi sa pag-benchmark batok sa pribadong sektor ug pagkonsiderar sa mga epekto sa inflation, ang gobyerno nagtinguha sa pag-establisar og patas ug malungtarong estraktura sa suweldo nga makapauswag sa kaayohan ug produktibidad sa mga empleyado niini.
Ang Kalihim sa DBM miingon usab nga ang resulta sa pagtuon maoy magsilbing basehan sa paghimo sa gikinahanglang mga kausaban sa Total Compensation Framework (TCF) sa mga kawani sa gobyernong sibilyan aron masiguro ang patas ug tukma sa panahon nga pag-adjust sa suweldo sa mga trabahante sa gobyerno.
Dugang pa niini, nga ang gasto sa pagpatuman sa maong compensation arrangement pagakuhaon gikan sa available nga appropriations ubos sa FY 2024 General Appropriations ug sunod-sunod nga tinuig nga appropriations.
