CEBU CITY- Nagpahayag og kasagmuyo si Cebu City Councilor Jun Alcover, chairman sa Committee on Agriculture, tungod sa giingong kakulang sa tukmang pagpangandam sa lokal nga kagamhanan alang sa mga mag-uuma nga apektado sa hulaw, ilabi na sa mga barangay sa kabukiran.
Sa pakighinabi sa Bombo Newsteam, matud ni Alcover nga wala pa masulbad ang pipila ka mga proseso nga gikinahanglan alang sa pagpatuman sa mga programa ug paghatag og tabang sa sektor sa agrikultura, lakip na ang pag-andam sa badyet, mga proposal ug kontrata.
Gipasiugda sa konsehal ang panginahanglan sa mas lig-on nga koordinasyon tali sa City Agriculture Department, Office of the Mayor ug ubang hingtungdang departamento aron mapadali ang pagtubag sa mga problema sa mga mag-uuma.
Lakip sa iyang gikabalak-an ang kakulang sa pondo ug kagamitan, sama sa water tanker nga magamit sa paghatod og tubig ngadto sa mga umahan ug komunidad sa kabukiran nga nag-atubang sa kakulang sa suplay sa tubig.
Gipasabot usab ni Alcover nga limitado ang iyang kapanguhaan isip konsehal ug gikinahanglan ang kooperasyon sa ehekutibong departamento aron matuman ang mga lakang alang sa sektor sa agrikultura.
Samtang, sumala sa datos sa Department of Agriculture, mikabat na sa ₱222 milyon ang kadaot sa mga pananom ug kahayopan sa tibuok Central Visayas tungod sa El Niño.
Hinuon, wala pa matino ang eksaktong kantidad sa kadaot sa mga pananom ug kahayopan sa Cebu City.
