Gipaubos sa operasyon si Cebu City Councilor Pastor “Jun” Alcover Jr. human kini madayagnos nga adunay Stage 1 prostate cancer, rason nga temporaryo kining dili makatambong sa mga sesyon sa konseho samtang anaa pa sa proseso sa pagpaayo.
Pinaagi sa iyang giluwat nga pamahayag niadtong Pebrero 9, 2026, pormal nga gipahibalo ni Alcover si City Council Secretary Charisse Piramide nga dili siya makatambong sa sesyon karong adlawa, Pebrero 10.
Sumala sa konsehal, kasamtangan siyang anaa sa tambalanan, subay sa tambag sa iyang mga doktor human sa malampusong operasyon.
Apan, bisan pa sa iyang kahimtang, positibo ang update nga gi-post ni Alcover sa social media diin iyang gipaabot ang pasalamat sa mga supporters ug medical staff, ug matod niya, kampante ang iyang doktor tungod kay sayo nga na-detect ang sakit.
Wala usab palabya ni Alcover ang higayon nga mohatag og tambag sa uban, ug gidasig niya ang mga lalaki nga nag-edad og 50 hangtod 60 anyos nga mopaubos sa regular nga prostate checkup.
Matod pa, sumala sa mga eksperto, ang prostate cancer dali ra matambalan ug taas ang survival rate kung madakpan kini samtang anaa pa sa sayong ang-ang.
Gawas sa iyang pamilya ug mga konstituwente, dako ang pasalamat ni Alcover sa tanang naghalad og pag-ampo alang sa iyang dinalian nga pagkaayo.
