Kasong murder ang gipasaka batok sa konsehal nga mipusil sa bise mayor sa Ibajay, Aklan sa buhatan sa Sangguniang Bayan sa maong lungsod.
Sa nasangpit nga report, ang suspek nga si konsehal Mihrel Senatin, nitug-an sa kapulisan nga giingong napuno na kini kang Bise Mayor Julio Estoloso.
Matud pa sa konsehal nga lahi ang pagtratar kaniya sa bise mayor hinungdan nga iya kining gipusil-patay.
Apan matod sa kauban sa suspek sa konseho nga walay kalainan ang pagtratar sa biktima sa suspek.
Gikompirmar sa mga awtoridad nga adunay lisensya ang armas nga gigamit sa suspek ug rehistrado kini kaniya.
Anaa na usab sa kapulisan ang CCTV footage sa nasangpit nga insidente.
Matod sa mayor sa maong lugar, ang LGU mopatuman og one-entry, one-exit policy sa munisipyo sugod sa Lunes.
Magdugang usab ang kapulisan og dugang pulis nga ipakatap sa Sangguniang Bayan Hall.
