CEBU CITY — Mihangyo si Cebu City Councilor Dave Tumulak sa Department of Education (DepED) nga tugutan ang City Government nga palugwayon pa ang paggamit sa mga tunghaan isip isolation centers og usa ka buwan.
Matud ni Tumulak nga nagkinahanglan ang dakbayan sa mga isolation centers aron ibutang ang mga asymptomatic patients ilabi na nga nagkasaka ang kaso sa COVID-19.
Una nang mipahibalo ang DepED nga gamiton ang mga classrooms isip isolation centers hangtud sa Hunyo 15 aron pangandaman ang pag-abli sa klase karong Agosto.
Maong nakita ni Tumulak nga dili gayud matabang kun mosunod gayud sa gitakda nga deadline.
Dugang pa ni Tumulak nga gikinahanglan gayud ang pag-isolate sa mga pasyente sanglit duha ka semana lang kini ikwarantina.
Kini aron usab nga mahatagan og igong medikal nga atensyon alang sa mga pasyente sulod sa maong isolation center.
Hinuon mipasalig kini sa DepED nga ilang i-disinfect ug tarungon ang mga classrooms sa dili pa ang pagbalik sa klase.
