CEBU CITY-Gitawag ni Cebu City Councilor Jose Abellanosa nga ‘alarming’ na ang mga krimen nga nahitabo sa dakbayan sa Sugbo.
Kini ang nahimong unod sa iyahang ‘privilege speech’ sa konseho niadtong nakalabay nga adlaw.
Matud ni Abellanosa nga subo palandungon nga ang mga biktima o ilahang mga pamilya kay sa social media na lang magpahibalo sa nahitabo o mupadayag sa ilahang sentimento.
Subay niini, giawhag sa konsehal ang iyahang mga kauban sa konseho ingon man ang Cebu City Police Office (CCPO) nga mabutangan ug mga close circuit television (CCTV) cameras ilabi na sa mga ‘heavily populated areas’ sama na lang sa mga adunay BPO companies diin sagad usab sa mga mabiktima kay mga call center agents.
Sigon pa, panahon na nga tun-an ang pag-provide ug mga shuttle bus alang sa mga call center agents ug uban pang mga empleyado nga manarbaho panahon sa kagabhi-on alang sa ilahang kaluwasan batok sa mga kriminal.
Gawas sa CCTV cameras, giingong gikinahanglan usab nga adunay tawo nga mag-monitor niini arun nga daling marespondihan kung ugaling adunay mga kasikas.
Mihangyo usab si Abellanosa sa CCPO nga dugangan ang police visibility sa dakbayan sa Sugbo.
