CEBU CITY-Planong i-standardize sa Sagguniang Panlungsod sa kagamhanang dakbayan sa Sugbo ang mga uniporme sa mga kawani sa Cebu City Transportation Office (CCTO) agig pag-obserbar sa pag-bag-o bag-o kada adunay muhulip nga administrasyon sa City Hall.
Ang proposal ipaagig ordinansa nga naggikan sa usa ka priviledged speech ni Cebu City Councilor Pastor “Jun” Alcover atol sa regular sesyon sa konseho niadtong nakalabayng Miyerkules, Nobyembre 20, 2024.
Diin gipadayag sa konsehal ang iyang kalibog sa pag-ila sa mga traffic enforcers sa dakbayan sa Sugbo, ang mga personnel nga gipakatap ubos sa CCTO.
Iyang gibanabana nga kini nga kalibog mahimong tungod sa kakuwang sa standardized nga uniporme sa mga traffic personnel.
Sa samang sesyon, giaprobahan sa konseho ang paghangyo sa CCTO nga mosagop og standardized uniform alang sa tanang personnel niini subay sa ilang mga gimbuhaton ug tahas.
Ubos sa administrasyon ni kanhi Cebu City Mayor Michael Rama, ang CCTO giilisan og ngalan nga Road Management Authority (RMA), nga matod ni Alcover, nakamugna og kalibog kalabot sa kalainan sa ilang uniporme.
Sa pagkakaron, si Alcover niingon nga lain-laing uniporme ang gisul-ob sa mga personnel sa CCTO, ang uban nagsul-ob og pula (red), berde (green), ug abohon (gray), samtang ang uban nagsul-ob pa og vest.
Dugang pa sa opisyal nga ang ingon nga mga kalainan nagpatunghag mga kabalaka sa ilang propesyonalismo sa tagdumala og trapiko sa dakbayan.
