CEBU CITY — Gibutyag ni Cebu City Councilor Joel Garganera, ang Emergency Operations Center Head nga wala na nag-operate ang club nga nakalapas sa Covid-19 standards sama sa social distancing.
Kini human nga temporaryong gi-suspenso ang license to serve liquor niini.
Matud ni Garganera nga kini ang nahimong resolusyon atol sa gipahigayong conference niadtong Mayo 18, ning kasamtangang tuig kauban ang tag-iya sa Clubholic, kapulisan ug sa Business Processing and Licensing Office (BPLO).
Nasuta matud pa ug wala kini gihimakak sa tag-iya nga adunay kalapasan sa lagda batok sa Covid-19 ang pagpahigayon ug disco.
Samtang gipahibawo sa konsehal nga wala pa gitugutan sa pangagamhanan sa Dakbayan sa Sugbo ang pag-abli sa mga club ug ang pagpahigayon og mga disco gumikan kay ang gitagaan lamang niini og special permit mao ang mga restobars nga mu-serve og ilimnong makahubog.
Gihimug-atan niini nga usa ka prebilihiyo ang pagbaton sa mga establishemento og special permit taliwa ning panahon sa pandemya busa kinahanglan nga sundon ang mga gitakdang mga health and safety protocols aron sa paglikay sa pagkuyanap sa Covid-19.
Nagkanayon kini nga sa hinay-hinay nga pag-abli sa ekonomiya, dili mamahimong isakripisyo ang public health.
Gipahimangnoan usab niini ang mga nag-operate nga mga restobar nga kanunay nga hinumduman ang mga nakat-onan sa training sa wala pa niini gi-ablihan ang establishemento aron malikayan nga mahitabo ang susama nga nahiaguman sa Clubholic.
Samtang dako ang pasalamat niini sa publiko sa kooperasyon nga gipakita sama sa pagpadangat sa ilang buhatan sa mga sayop nga binuhatan aron kini masolusyonan.
Nanawagan si Garganera sa publiko nga padayon ang pagtuman sa mga minimum health standards aron usab sa padayon nga pag-abli sa mga nagkadaiyang establishemento sa Dakbayan sa Sugbo.// BRA, BEP
