Gikatahong mamahimo pa nga modagan pagka-mayor ang kontrobersyal nga mayor sa Bamban Tarlac nga si Alice Guo sa May 2025 midterm elections.
Kini maoy gipahibawo sa Commission on Elections taliwala sa mga kontrobersiya ug misteryo kalabot sa personalidad ni Guo, nga karon nalambigit usab sa ilegal nga operasyon sa Philippine Offshore Gaming Operator o POGO.
Gipasabot ni Comelec Chairman George Garcia, ang usa ka lokal nga opisyal mahimong modagan sa piniliay basta wala pa final conviction ang korte kalabot niini.
Matod niya, kon moisyu og suspension order ang Department of the Interior and Local Government batok kang Guo, tugotan gihapon siya sa poll body nga maka-file sa iyang certificate of candidacy tungod matod niya ang suspension order nga gipagawas dili makonsiderar nga final conviction o hukom sa kaso batok sa usa ka opisyal.
Kung kahinumdoman, unang nipagawas og rekomendasyon ang DILG ngadto sa Office of the Ombudsman nga suspensuhon si Guo tungod sa giingong kalambigitan niini sa ilegal nga operasyon sa POGO sa lungsod sa Bamban.
Samtang ang National Police Commission nilusad usab og kaugalingong imbestigasyon aron matangtang ang gahom ni Guo isip mayor sa pagdumala sa mga polis nga nadestino sa ilang lugar.
