CEBU CITY-Gibutyag sa kadagkoan sa Cebu City Police Office (CCPO) nga adunay dakong pagkunhod sa gidaghanon sa mga insidente sa krimen nga natala sa unang quarter sa 2024 kon itandi sa miaging tuig.
Kini ang gitino ni Police Colonel Ireneo Dalogdog, nga ang datus sa CCPO nagpakita nga gikan sa 3,333 ka insidente sa krimen sa dakbayan sa Sugbo gikan sa Enero 1 hangtod Mayo 13, 2023, nius-os kini og 83.08 porsiyento, nga adunay 2,769 ka krimen sa samang panahon karong tuiga.
Nakatala usab ang mga otoridad og 313 ka mga insidente sa 8 focus crimes, kini nga ihap mas ubos og 10.1 porsyento kon itandi sa 348 ka insidente niadtong 2023.
Samtang adunay 154 ka insidente sa pagpangawat, 64 ka physical injury, 40 ka tulis, 24 ka pagpatay, 17 ka pagpanglugos, 10 ka car-napping, ug 4 ka homicide gikan sa Enero hangtod Mayo 13.
Base sa peace and order indicator, niubos usab ang non-index crimes ngadto sa 1,976 gikan sa 1,929 ka insidente sa unang quarter sa 2023.
Sa crimes against persons, adunay 109 ka insidente kon itandi sa 123 nga natala sa miaging tuig, kung diin nius-os ang ihap sa mga krimen batok sa kabtangan gikan sa 225 sa miaging tuig ngadto sa 204 karong tuiga.
Dugang pa, adunay 37.5 porsyento nga pagkunhod sa gidaghanon sa mga insidente sa sakyanan/trapiko, nga adunay 660 ka insidente nga natala karung tuiga, nga kung itandi sa susamang panahon sa miaging tuig, niabot og 1,056 ka mga insidente.
Matod ni Dalogdog, usa sa nakatampo niining pagkunhod sa gidaghanon sa mga krimen sa dakbayan sa Sugbo mao ang epektibong police visibility.
Dugang pa, nga ang pag-ubos sa mga krimen nagpakita nga epektibo ang ilang estratehiya sa pag-adjust sa deployment sa mga personahe ngadto sa mga crime-prone areas kon gikinahanglan.
