Gituki sa mga foreign ministers sa Association of Southeast Asian Nations (ASEAN) ang plano sa kalinaw ug ang bag-ohay lang nahuman nga eleksyon sa Myanmar isip usa sa mga dinalian nga agenda sa ilang unang dakong tigom ubos sa pagpangulo sa Pilipinas karong semanaha.
Sumala ni Department of Foreign Affairs (DFA) spokesperson for ASEAN Dax Imperial, ang isyu sa Myanmar pagatukion ubos sa Five-Point Consensus (5PC) atol sa ilang retreat discussion. Gitataw niya nga gipaabot pa kon sa unsang paagi hisgutan sa mga ministro ang resulta sa eleksyon sa Myanmar, apan segurado nga kini ipaubos sa framework sa maong consensus.
Ang Dakbayan sa Sugbo mao ang mo-host sa informal nga konsultasyon bahin sa implementasyon sa 5PC karong Miyerkules, nga pagasundan sa ASEAN Foreign Ministers’ Retreat sa adlawng Huwebes.
Kahinumduman nga sa niaging ASEAN Leaders’ Summit, nipadayag ang grupo og “lawom nga kabalaka” sa nagpadayong kagubot ug makaluluoy nga kahimtang sa katawhan sa Myanmar, lakip na ang hinay nga pag-uswag sa implementasyon sa 5PC. Gikondenar sa mga lider ang walay hunong nga pagpamintas ug nanawagan sa tanang partido nga hunungon na ang bayolenteng mga aksyon aron mahatagan og dalan ang tabang ug dinalian nga politikanhong dayalogo.
