Kumpirmado nga anaa na sa kapin sa 500 ka mga tawo ang namatay sa sunod-sunod nga mga protesta sa Iran.
Base sa pinakabag-ong datos gikan sa mga aktibista sa sulod ug gawas sa Iran, ang grupo sa tawhanong katungod nga nakabase sa US nga HRANA nagtaho nga ilang gipamatud-an ang kamatayon sa 490 ka mga nagprotesta ug 48 ka mga security personnel samtang kapin sa 10,600 ka mga tawo ang nadakpan sa duha ka semana nga kagubot sa nasud.
Bisan pa, wala pa’y opisyal nga numero nga gipagawas sa gobyerno sa Iran hangtod karon.
Ang telebisyon sa estado sa Iran nagpakita og dosena nga mga bag sa mga patayng lawas sa nataran sa opisina sa coroner sa kapital nga Tehran, diin gitaho niini nga ang mga patay mga biktima sa mga insidente nga gihimo sa “armadong mga terorista” ug ang footage nagpakita sa mga minahal sa mga biktima nga naghulat sa gawas sa Kahrizak Forensic Medical Center sa Tehran samtang naghulat sila nga mailhan ang mga patayng lawas.
Gumikan niini, nagpahayag sa iyahang kakurat si UN Secretary-General Antonio Guterres sa mga taho sa kapintasan sa mga awtoridad sa Iran ug nanawagan alang sa labing taas nga pagpugong ug gipasiugda ang hingpit nga pagtahod ug pagpanalipod sa mga katungod sa mga lungsuranon sa kagawasan sa pagpahayag, asosasyon ug malinawon nga pagtigom.
Niadtong Domingo, ang mga awtoridad sa Iran nagdeklara og tulo ka adlaw nga nasudnong pagbangotan agig pasidungog sa mga biktima, nga gitawag og “mga martir” nga gipatay sa ilang pagsukol batok sa US ug Zionist nga rehimen.
Miulbo ang mga protesta sa Iran niadtong Disyembre 28, 2025, nga nagpahayag sa kasuko tungod sa krisis sa ilang ekonomiya tungod sa rekord nga taas nga inflation, taas nga presyo sa pagkaon, ug pagkahugno sa rial.
Giakusahan sa mga awtoridad sa Iran ang US ug Israel nga nagpasiga sa kagubot sa ilang nasud ug nanawagan alang sa usa ka nasudnong rally aron kondenahon ang giingong mga aksyong terorista nga gipangulohan sa Amerika ug Israel.
