CEBU CITY – “Wala nako’y mahimo”.
Kini ang bugtong nalitok ni Carreta Barangay Captain Marciano Ando kalabot na sa pagpang-apud-apud ug mga relief goods sa Mayor’s Information and Liaison Office (MILO) kinsang sinaligan ni Cebu City Mayor Edgardo Labella.
Matud ni Ando nga kung ugaling gisagolan gayud ug politika ang paghatag ug hinabang sa mga barangay, hayan wala na siya’y mahimo niini inay pasagdan na lang nga maglihok ang MILO.
Apan, giklaro sa naasoy nga kapitan nga andam usab sila nga mutabang sa distribusyon kung makig-alayon kanila ang MILO kansang gipangamahanan sa kanhi kapitan ug karun konsehal sa barangay nga si Eduardo Lauron ug kasamtangan nga gidala sa asawa niini nga Rowena Lauron.
Giangkon ni Ando nga daghan gayud sa iyahang mga konstituwente ang mireklamo, apan giingong wala gayud kini kasayoran sa hinabang, hinungdan nga ang tanang reklamante ang iyaha na lang nga gihandos sa MILO.
Gitataw usab sa opisyal nga wala gayud kini nakadawat ug ayuda gikan sa Cebu City Hall, apan dili kini babag arun nga makalihok usab sila sa barangay.
Gipadayag ni Kapitan Ando nga hugot nilang gipatuman ang social distancing, curfew, pag-disinfect sa mga kabalayan, ingon man ang mga probisyon sa Executive Order ni Mayor Labella subay sa Enhanced Community Quarantine sa dakbayan.
Samtang, gikasagmuyo sa kapitan ang wala pagtubag ni Atty. Floro Casas, ang City Administrator, sa sumbong niini nga nag-doble na ang quarantine pass nga madawat sa ilahang mga residente gumikan kay nanghatag man usab ang MILO ug nanghatag usab sila sa barangay.
Nagkanayon kini nga igo lang mitubag si Atty. Casas nga ipadayon lang nila sa barangay ang pagpanghatag sa QP ug magpadayon usab ang pagpanghatag sa MILO.
