Gikumpirmar sa Department of Justice nga ang kustodiya sa kanhi Department of Public Works and Highways Bulacan 1st District Engineer nga si Henry Alcantara opisyal ug permanente nang gibalhin sa Witness Protection Program.
Kini human sa pormal nga pagsumiter sa usa ka suwat ngadto kang Senate President Vicente Sotto III mahitungod sa pagbalhin sa kustodiya sa kanhi opisyal.
Busa, si Alcantara anaa na karon sa ‘protective custody’ sa maong programa apan sumala ni Justice Secretary Fredderick A. Vida, dili nila ipaambit ang espesipikong lokasyon diin siya dad-on.
Ang kanhi Public Works Engr., usa sa mga gipili sa departamento nga mahimong ‘state witness’ sa nagpadayon nga imbestigasyon sa pagkontrol sa baha.
Gawas kang Alcantara, state witness usab sila si kanhi Public Works Usec. Roberto Bernardo, Gerard Opulencia ug kontraktor nga si Sally Santos.
Gipasalig usab sa Department of Justice nga kini magpabilin nga aabli kung kinahanglan nga moatubang si Alcantara sa ubang mga ahensya.
Miingon siya nga ang katuyoan sa pagbalhin sa kustodiya ug pagpailalom kanila sa programa mao ang pagsiguro nga ang mga kaso nga gisang-at batok sa mga indibidwal nga nalambigit makompleto.
