Gi-intercept sa air defenses sa Kuwait ang mga missile ug drone niadtong Miyerkules, sumala sa taho sa state news agency, nga mikutlo sa kasundalohan sa nasod nga wala magbutyag kon diin gikan ang maong mga hulga.
Gipahayag sa General Staff sa kasundalohan nga ang mga pagbuto nga nadungog sa publiko naggikan sa mga interception nga ilang gihimo.
Tungod niini, giawhag ang katawhan nga sundon ang mga instruksiyon sa kaluwasan ug likayan ang pagduol sa mga debris o bisan unsang wala mailhing mga butang.
Gipagawas ang maong pamahayag human usab gitaho sa media sa Iran nga adunay nadungog nga mga pagbuto sa Isla sa Qeshm, apan wala pa matino kon unsa ang hinungdan niini.
Dungan niini, gipatingog usab sa Ministry of Interior sa Bahrain ang warning siren ug giawhag ang mga lumulupyo nga magpabiling kalmado samtang nagpalayo padulong sa labing duol ug luwas nga mga dapit.
Sa nangaging mga adlaw, nakasinati na ang Kuwait og sunod-sunod nga pag-atake sa missile ug drone nga giingong gikan sa Iran, apan wala pay opisyal nga kumpirmasyon kon kinsa ang responsable sa pag-atake niadtong Miyerkules.
