CEBU CITY — Andam nga modagan si Cebu City Mayor Edgardo Labella sa ipahigayong ceremonial torch relay sa nagkaduol nga 30th Southeast Asian Games karong Sabado, Nobyembre 16.
Kini human nga nalakip ang mayor sa mga mobitbit sa torch diin modagan sila, kauban ang 2,500 ka mga partisipante, sa South Road Properties, sa dakbayan sa Sugbo.
Pagasalmutan usab kini sa mga tinun-an, kapulisan, kasundaluhan, ug mga empleyado sa gobyerno.
Matud ni Labella nga buhaton niya ang pagbitbit sa torch gumikan kay misalmot kini kaniadto og mga marathon sa iyang panahon.
Mag-una sa maong torch relay si Presidential Assistant for the Visayas Michael Dino kauban ang mga inila nga Cebuano athletes, lakip na ang Marathon Queen nga si Mary Joy Tabal.
Pagkahuman sa relay, pagasundan kini sa usa ka hamubo nga lighting ceremony ug programa.
Usa ang Cebu City sa mga venues sa ceremonial torch relay isip pagpangandam sa nagkaduol nga 2019 SEA Games diin magsugod kini karong Nobyembre 30.
